چونە دەرەوەی حەسار

عاشقه ‌نوستوه‌كه ‌له‌كوێی

ئه‌مرۆ رۆژێكی جوانه‌ وه‌ره‌ با دڵمان پڕ له ‌نه‌شئه‌كه‌ین

با دڵمان هه‌تا ئه‌به‌د بسپێرین به‌عه‌شق

وه‌ره‌ با حوزنی ئه‌و شه‌وانه‌، عه‌شقی ئه‌و شه‌وانه‌ بچنینه‌وه‌، كه‌خۆشمان نه‌مانزانی چۆن له‌ده‌ستمان ده‌رباز بون

وه‌ره ‌ئه‌مجاره ‌گه‌نجانه‌تر له‌سڕی ڕوتبونه‌ی شه‌و ده‌گه‌ین له‌ناو كه‌ناری مانگدا

وه‌ره‌وه‌ چكلێتی لێوی شه‌وێك ئاڵده‌كه‌ینه‌وه‌

وه‌ره‌ و  به‌رگی شینی شه‌وێك روتده‌كه‌ینه‌وه‌

سینه‌ی سیحری شه‌وێك تا به‌ره‌به‌یان گه‌رم ده‌كه‌ینه‌وه‌

وه‌ره ، ‌دڵی عه‌شق گه‌ر ئه‌مجاره‌ له‌كار كه‌وت مه‌حاڵه ‌بكه‌وێته‌وه‌ گه‌ڕ و زیندوبێته‌وه‌

وه‌ره‌ و شێتانه‌ ببه‌ هاوڕێم ،

وه‌ره‌ دار و په‌ردوی مه‌مله‌كه‌تی خاپوربوی دڵی شیعر  سه‌ریه‌ك بخه‌وه‌

هه‌ر ئه‌مشه‌وم وه‌خت ماوه‌ بۆ زیاره‌تی كه‌عبه‌ی ڕووت

تا نه‌رۆشتوم و له‌دونیا نه‌بوم بێخه‌به‌ر ، ده‌ستم بگره‌و پڕمكه‌ له‌نور

به‌شكه‌ گه‌ر چومه ‌دیداری خودا ، پڕیشكی نوری تۆ بناسێته‌وه‌،

بمكاته‌ په‌ری بۆ خزمه‌تی ڕوناكی ئه‌به‌دیی تۆ

عه‌شقه جوانه‌كه‌ی ئه‌و به‌ری دیار ، شیعره‌ نه‌نوسراوه‌كه‌ی مه‌ستیی كه‌نار

ده‌زانم دڵت له‌شیعر  تۆراوه‌، چونكه‌ قودره‌تی وه‌سفی تۆی له‌خۆیا پێ هه‌ڵناگیرێ

ده‌زانم دڵت له‌چیرۆكه ‌دڵ یه‌شاوه‌كان ڕه‌نجاوه‌ ، كه‌ چیرۆكی شیكارێكی زه‌ردی ملی پایزتی نه‌ نه‌خشاندوه‌.

ده‌زانم ئه‌فسانه‌كان نه‌یان توانیوه ‌سیحری چاوێكت بنوسنه‌وه‌

ئه‌مشه‌و گه‌ر بێیت ، نه‌شیعرێك و نه‌دوان ، نه‌چیرۆكێك و نه‌دوان ، نه‌ئه‌فسانه‌یه‌ك و نه‌سیان له‌دڵمدا به‌رپاده‌كه‌ی

گه‌ر بێیت ئیعلانی عه‌شقێكی نه‌نوسراوه ‌ده‌كه‌ین

گه‌ر بێیت ئیعلانی سه‌ربه‌خۆیی وڵاتی باران ده‌كه‌ین

مه‌مله‌كه‌تی باڵ  جودا ده‌كه‌ینه‌وه ‌و ئاسمانی فڕین ده‌ده‌ینه‌وه‌ ده‌ست عه‌شق

فڕین پڕده‌كه‌ین له‌شێتی و مه‌ستی

ده‌چین له‌وپه‌ڕی دونیا ، له‌ژێر كه‌پرێكی ئه‌فسوناویا ترێ ده‌ڕنین بۆ شه‌رابی دوای فڕینێكی ته‌نهاییانه‌

ئه‌زانی ئه‌چین بۆ كوێ ؟ ئه‌چین سه‌فه‌ر ده‌ده‌ینه‌وه‌ ده‌ستی دایكی

ئه‌چین هیلاكی موسافیره ‌عاشقه‌كان ده‌كه‌ینه‌ مێژوو  و سه‌فه‌رنامه‌ی عه‌شق ده‌كه‌ینه‌ كتێبێكی پیرۆز

ئه‌چین نه‌خشه‌ی سه‌ڵته‌نه‌تی عه‌شق سه‌رله‌نوێ داده‌ڕێژینه‌وه‌، تۆ ببه‌ره‌ شازاده‌ و منیش به‌نده‌

حه‌زده‌كه‌م  وێنه‌ی ئه‌وساته‌ بكێشم كه ‌به‌خه‌یاڵ شیعرێكی تۆم  ، له‌من زیاتر كه‌س شكنابه‌ی بیكه‌یته‌ سه‌گوزشته‌ی رۆمانێك ، له‌تۆ زیاتر كه‌س شك نابه‌م كه‌ تۆ هی منیت

ئه‌مجاره‌ به‌ڵێن له‌"با" ی هۆنراوه ‌وه‌رده‌گرم  ئه‌وه‌نده ‌سارد نه‌بێت ، كه‌ڵكی روتبونه‌وه‌ی پێوه‌بێت

به‌" ته‌م"ی  ده‌وروبه‌ری باخچه‌ی قه‌سیده‌یه‌ك ده‌ڵێم بۆ یه‌ك رۆژ قودره‌تی خۆی بنوێنێ‌، دونیا پركات ‌له‌حوزنی دوو ده‌ستی شه‌رمن

به‌فه‌رهادی نه‌وره‌سێك  ده‌ڵێم له‌په‌نا هێلانه‌كه‌ی شیریندا ئه‌فسانه‌یه‌ك بۆ باڵی عه‌شق له‌كێوی فڕیندا  سازبدا

ده‌چینه‌ ده‌ره‌وه‌ی حه‌سار، ده‌چین له‌پشت گاشه‌به‌رده‌كانی زه‌مه‌نه‌وه ‌به‌فه‌رامۆشی و له‌رزی عه‌شق پێده‌كه‌نین

17:45 - 15.4.2008 - ناردنی په‌یام

کۆمێنتی بێ‌ناو

دیسان دەست خۆش خاوەنی خامەیەکی ئارام .
ئەزیز هەروەک پێشبینیت کردووە دەشێت منیش دەسکێک لە کازیوەی شیعر لە هەناومدا بەیانیانی دەرون بنەخشێنن . من پێم وایە هەرچی بۆنی پرچی ڕەشماڵانەی کیژە کوردێکی کردبێت هەوێنی هەزاران بەیتە شیعری لێ فێر بووە ، هەرچی وێنەی شپرزەبوونی خۆی لە سۆمای كیژە چاوخەزاڵێکی گەرمیان و کوێستانکەراندا دیبێتەوە چرۆی دەیان خونچە شیعر لە باخەکانی خەیاڵیدا سەوزبووە.
ئەزیزە ئارامەکە ، بەەڵێ هەزاران جار خوازیار بووم کە بتوانم وەک وڵوڵەو حەتحەتۆکە هۆنراوەیەک بە پرچی نیمچەلوولی شۆڕە ژنێکی کورددا بکەم، بەڵام هورژمی وشە ڕازاوەکان لە دەرکۆکەی هزرمدا پەلەقاژەی دەرچونیان بووە تا وەک کلوی بەفرێک لێوی ئازیزێکی تینوو بمژن بۆیە هەر لەگەڵ دەرکەوتنیان لە دەرکۆکەکەی هزرمەوە وڕ و سەرخؤش دەنوێنن و نەیاندەتوانی ڕیزەکانی سەما و چۆپی کوردانە ساز بکەن. بۆیە دەخوازم لێیان گەڕێم تا گەڕەلاوژە سازدان بە دووریانخەم .
ئەوەتا چەندینی وەک بەڕێزت بە ئارامی بەیداخی شیعرتان بەر هەوای دەروون ناوە تا بشەکێتەوە. ئەوەتا بە جوانی عاشقە نوستوەکان گاز دەکەیت و پێیان دەڵێت تا پەری ئاسا جکلێتی لێوی شەوانێک ئاڵکەنەوە.
هەر بژیت و سەرکەوتوو بیت.

هەوار

نه‌ناسراو - 08:09 - 17.4.2008

---

دیسان سڵاو

دیسان سڵاو دۆستی ئازیز .
من و شیعر ، بریا وات نەوتبایە ، ئەزانی قەت حەزم لەوە نەبوە ببم بە شاعیر ..ههههه
بەڵآم حەزم لە هەناسە و جوانکاری شیعریە ..عەشقی وشەی ناسک جار جار پڕیشکیش دەگرێتە خۆت . ئەوەی من هەستی پێدەکەم تەنها پڕیشکە .. خۆ بون بە شیعرنوس کارێکی خراپ نیە بەس بەخوا لە شان و شەپیلکی من ناوەشێتەوە ، تۆیەک پڕێت لە وەسفی جوان زات ناکەی شیعربنوسی ، بابایەکی فەرقیری وەک من بڵێ چی .
دۆستی شیعرم وەلێ شاعیر نیم ... ههههه ، شیعر بونەوەرێکی عوناحە با خۆمی لێنەکەمە شاعیر ، وەک ئەوەی لە هەر کۆچەیەکدا دەیبینی دار و بەرد بوە بە شاعیر . ئەزانی بەیەک وشە گەر بیڵێم ، ڕو لە هەر سەردیوار و قەدی دارێک دەکەی دوو وشەی تیا هەڵکۆڵێ ، ئەوەندەی لەسەر نوسراوە جێ ی خاڵی تیا نەماوەتەوە ،چی دی بەشێک نەماوەتەوە بۆ وتن.
ئینجا شتێک من براکەم شاعیرە ، دوو شاعیریش لە ماڵێکدا خۆش نیە هههههههههههههه

Aram - 12:44 - 19.4.2008

---

دەریای خەم لە زەرفی وشەدا جی نابێتەوە

کاتێ کە خەم پەنجەیەکی لاواز کەلەپچە دەکا ، کاتێ هاوارێک لە گەرودا دەخنکێ ، کاتێ گوڵی پێش پشکوتن پێشێل دەبێ ،هەموو وشە ناسکەکانی جیهان ناتوانن ببنە شێعرێ مانای ئـــــــــــــــــاخ و ئــــــــــــــــــــۆفێکی ئازار بگێرنەوە.
هەموو شاعیرەکانی جیهان ناتوانن رۆژێکی عومری بە با چوو لە تابلوی هەستیان بکێشنەوە.

غەریـــــــــبە - 01:56 - 20.4.2008

---